Psalm 57 - Pennsylvania Dutch Bible

Da 57. Psalm. En Gebayt Fa Hilf

Zumm foah-singah. Fa ksunga sei zumm leet, “Du's Nett Fadauva”. En Psalm fumm Dawfit vo eah in's felsa-loch ganga is vekk fumm Saul.

¹ Sei gnaydich zu miah, oh Gott, sei gnaydich, fa in dich draut mei sayl. Im shadda funn dei flikkel nemm ich mich aus di kfoah, biss deah druvvel fabei is.

² Ich roof zumm Alli-Haychshta Gott, zu Gott, deah es miah alles gebt es ich brauch.

³ Eah shikt miah saylichkeit fumm himmel, un zankt selli es mich nunnah dredda. (Sela) Gott shikt sei leevi un voahheit raus.

⁴ Ich lei mitt mei sayl unnich vildi layb, selli es mensha-kinnah fressa. Iahra zay sinn shpiahs un arrows, un iahra zunga shaufi shvadda.

⁵ Hayb dich uf, oh Gott, ovvich da himmel; loss dei hallichkeit ivvah di gans eaht sei.

⁶ Si henn iahra net ksetzt fa mei shritt fanga, un mei sayl is niddah gebikt. Si henn en loch gegrawva in mei pawt, avvah si selvaht sinn nei kfalla. (Sela)

⁷ Mei hatz is shtandhaftich, oh Gott, mei hatz is shtandhaftich. Ich zayl singa un dich lohva.

⁸ Vekk uf, mei sayl; vekk uf, psaltah un harf! Ich zayl ufvekka eb dawk.

⁹ Ich zayl dich danka, oh Hah, unnich di leit, ich zayl diah lohb singa unnich di heida.

¹⁰ Fa dei shtandhaftichi-leevi langd nuff biss an da himmel, un dei voahheit biss an di volka.

¹¹ Hayb dich uf ovvich da himmel, oh Gott; loss dei hallichkeit ivvah di gans eaht sei.