Psalm 54 - Pennsylvania Dutch Bible

Da 54. Psalm. En Gebayt Fa Frei Kalda Sei

Zumm foah-singah. Fa foah-kshpeeld sei mitt harfa. En lanning fumm Dawfit noch demm es di mennah funn Siph zumm Saul ganga sinn un henn ksawt, “Da Dawfit is am sich fashtekla unnich uns.”

¹ Helf miah, oh Gott, deich dei nohma; deich dei graft shaff aus mei recht fa mich.

² Heich mei gebayt oh, oh Gott, un heich di vadda ab funn mei maul.

³ Shtolsi leit henn sich ufkshteld geyyich mich; unfashtendlichi mennah vella mei layva nemma; si henn Gott nett fannich sich ksetzt. (Sela)

⁴ Avvah gukket moll, Gott is mei helfah; da Hah hald mei sayl levendich.

⁵ Eah drayt's evila funn mei feinda zrikk uf si selvaht; un sei shtandhaftichkeit bringd si zu en end.

⁶ Ich bring en frei-villich opfah zu diah, un ich gebb dank zu dei nohma, oh Hah, fa es is goot.

⁷ Du machsht mich frei funn awl mei druvvel; mei awwa gukka uf mei feinda un sinn zufridda.