Psalm 29 - Pennsylvania Dutch Bible

Da 29. Psalm. Di Shtimm Fumm Hah Im Shtoahm

En Psalm fumm Dawfit.

¹ Bringet zumm Hah, diah himlishi, bringet zumm Hah hallichkeit un graft.

² Bringet zumm Hah di hallichkeit es zu seim nohma heaht, baydet da Hah oh, in sei heilich glayt.

³ Di shtimm fumm Hah drawkt ivvah di vassahra, da Gott funn hallichkeit dimmeld, da Hah dimmeld ivvah di grohsa vassahra.

⁴ Di shtimm fumm Hah is greftich, di shtimm fumm Hah is hallich.

⁵ Di shtimm fumm Hah fabrecht di cedar-baym, da Hah fabrecht in shtikkah di cedar-baym funn Lebanon.

⁶ Eah macht Lebanon rumm tshumba vi en hamli, un Sirion vi en yungah vildah ox.

⁷ Di shtimm fumm Hah shikt feiyah-flamm naus.

⁸ Di shtimm fumm Hah shiddeld di vildahnis; da Hah shiddeld di Vildahnis funn Kades.

⁹ Di shtimm fumm Hah shiddeld di aycha-baym, un blohst di bleddah funn di busha. In seim tempel greisht alli-ebbah, “Halichkeit zu Gott!”

¹⁰ Da Hah hokt ivvah di flott uf seim kaynich-shtool; da Hah hokt es Kaynich fa'immah.

¹¹ Da Hah gebt grefta zu sei leit; da Hah saykend sei leit mitt fridda.