Psalm 28 - Pennsylvania Dutch Bible

Da 28. Psalm. En Gebayt Fa Hilf

En Psalm fumm Dawfit.

¹ Vann ich roof zu diah, oh Hah, mei Felsa, dray nett en dawb oah zu miah; fa vann du shtill bleibsht, dann vatt ich vi selli es nunnah in's grawb gayn.

² Heich mich am roofa fa bamhatzichkeit vi ich dich frohk fa hilf, un diveil es ich mei hend uf hayb geyyich deim Alli-Heilichshta Blatz.

³ Shlayf mich nett vekk mitt di gottlohsa, un mitt di evil-shaffah— selli es freindlich shvetza mitt iahra nochbahra, avvah hass henn in iahra hatza.

⁴ Betzawl si zrikk fa vass si doon, un fa iahra evili verka; betzawl si zrikk fa vass iahra hend gedu henn, un gebb eena vass si fadeend henn.

⁵ Veil si nett acht nemma fumm Hah sei eahvet, adda vass sei hend gedu henn, dann zayld eah si nunnah reisa, un si nee nimmi ufbauwa.

⁶ Glohbt sei da Hah, veil eah mich keaht hott roofa fa bamhatzichkeit.

⁷ Da Hah is mei graft un mei shield; mei hatz draut eem, un eah hott miah kolfa. Mei hatz is fraylich, un ich dank een am singa.

⁸ Da Hah is di graft funn sei leit, en sayfah roo-blatz un hilf fa sei ksalbdah.

⁹ Helf dei leit un sayken dei eahbshaft; sei iahra shohf-heedah un drawk si ayvichlich.