Psalm 15 - Pennsylvania Dutch Bible

Da 15. Psalm. Vass Gott Frohkt Fumm Mensh

En Psalm fumm Dawfit.

¹ Oh Hah, veah dauf in deim tent voona? Veah dauf uf deim heilicha hivvel voona?

² Sellah es unshuldich is, un dutt vass recht is. Sellah es di voahret sawkt fumm hatz.

³ Eah drawkt kenn kshvetz mitt sei zung, un dutt nix letzes geyyich sei nochbah, un gebt sei freind kenn shlechtah nohma.

⁴ Eah gukt nunnah uf di gottlohsa, avvah eah gebt eah zu selli es da Hah firchta. Eah hald sei vatt, even vann's eem selvaht vay dutt.

⁵ Eah laynd sei geld naus unni indressa, un nemd kenn geld hinna rumm fa shvetza geyyich di unshuldicha. Veah-evvah es dee sacha dutt zayld nee nett vekk falla.