Psalm 142 - Pennsylvania Dutch Bible

Da 142. Psalm. En Gebayt Fa Hilf

En shreives fumm Dawfit, vo eah im felsa-loch voah; en gebayt.

¹ Ich roof zumm Hah mitt mei shtimm; mitt mei shtimm bitt ich da Hah fa bamhatzichkeit.

² Ich leah mei beglawk aus fannich eem, fannich eem sawk ich awl mei druvvel.

³ Vann's meim geisht angsht vatt, is es dich es mei pawt vayst. Im vayk vo ich lawf henn si en fall ksetzt fa mich.

⁴ Gukk uf mei rechtsi seit un sayn, nimmand nemd acht funn miah, 'sis neiyets es ich hee fleeya kann, nimmand gebt ebbes um mich.

⁵ Ich roof zu diah, oh Hah, ich sawk, “Du bisht mei Roo-Blatz, mei dayl im land funn di levendicha.”

⁶ Heich mich oh, fa ich habb en grohsi noht. Mach mich frei funn selli es mich fafolka, fa si sinn zu shteik fa mich.

⁷ Bring mich aus demm kfengnis, so es ich dei nohma danka kann. Di gerechta zayla sich um mich rumm fasamla, veil du so goot bisht zu miah.