Psalm 138 - Pennsylvania Dutch Bible

Da 138. Psalm. Dank Fa Gott Sei Hilf

Fumm Dawfit.

¹ Ich dank dich funn meim gansa hatz; fannich di gettah vill ich diah lohb singa.

² Ich bikk mich nunnah geyyich dei heilichah tempel, un gebb dank zu dei nohma, fa dei shtandhaftichi-leevi un voahheit, fa du hosht dei nohma un dei vatt uf kohva ovvich alles shunsht.

³ Vo ich dich ohgroofa habb, hosht du andvat gevva; mitt dei graft hosht du mei sayl fagrefticht.

⁴ Awl di kaynicha uf di eaht zayla dich danka, oh Hah, veil si di vadda funn dei maul keaht henn.

⁵ Si zayla singa veyyich di vayya fumm Hah, veil di hallichkeit fumm Hah so grohs is.

⁶ Even vann da Hah hohch is, gukt eah alsnoch aus fa di niddahra, avvah di shtolsa kend eah funn veit ab.

⁷ Vann ich in di mitt funn druvvel lawf, dann dusht du mich levendich halda; du shtreksht dei hand naus geyyich da zann funn mei feinda, un mitt dei rechtsi hand machsht mich frei.

⁸ Da Hah zayld selli sacha ausfiahra es zu du henn mitt miah; dei shtandhaftichi-leevi, oh Hah is ayvichlich, faloss nee nett di verka funn dei hend.