Psalm 130 - Pennsylvania Dutch Bible

Da 130. Psalm. En Gebayt Fa Hilf

En leet fa ksunga sei uf em vayk nuff an Jerusalem.

¹ Aus em deefa roof ich zu diah, oh Hah.

² Oh Hah, heah mei shtimm! Loss dei oahra abheicha zu mei roof fa hilf.

³ Vann du sinda uf shreiva daytsht, oh Hah, veah kend shtay?

⁴ Avvah du fagebsht uns, so es miah dich firchta doon.

⁵ Ich voaht uf da Hah, mei sayl voaht, un ich du mei hofning in sei vatt.

⁶ Mei sayl voaht uf da Hah, may es di vatsh-mennah voahra fa da meiya, may es di vatsh-mennah voahra fa da meiya.

⁷ Oh Israel, du dei hofning in da Hah, fa mitt em Hah is shtandhaftichi-leevi, un mitt eem is di foll saylichkeit.

⁸ Eah macht Israel saylich, funn awl iahra sinda.