Psalm 110 - Pennsylvania Dutch Bible

Da 110. Psalm. Da Hah , Da Ayvich Kaynich

En Psalm fumm Dawfit.

¹ Da Hah hott ksawt zu meim Hah, “Hokk dich an mei rechtsi seit, biss ich dei feinda en foos-shtool mach fa dei fees.”

² Da Hah shikt dei mechtichah zeptah naus funn Zion. Rool ivvah dei feinda!

³ Dei leit zayla sich frei-villich ohbeeda, uf em dawk es du eena foah gaysht im heilicha glayt. Vi du yung voahsht, kumma dei grefta zu diah alli dawk vi da dau aus em meiya-roht.

⁴ Da Hah hott kshvoahra, un eah fa'ennaht sei vatt nett; “Du bisht en preeshtah fa'immah, noch di gleichlich adning fumm Melchisedek.”

⁵ Da Hah is an dei rechtsi seit, eah shlakt di kaynicha uf em dawk funn sei zann.

⁶ Eah zayld di heida richta, un di dohda zayla ivvahrawlich leiya. Eah zayld di roolah's shlauwa ivvah di gans eaht.

⁷ Da kaynich zayld drinka funn di grikk am vayk nohch, un deich sell zayld eah sei kobb uf hayva.