Psalm 11 - Pennsylvania Dutch Bible

Da 11. Psalm. Fadrauwung Im Hah

En Psalm fumm Dawfit. Zumm foah-singah.

¹ Ich gukk zumm Hah fa mich aus di kfoah halda. So favass sawksht du miah, “Fleek nuff in di berga vi en fokkel?

² Gukk moll, di gottlohsa zeeya iahra bow zrikk; si setza iahra arrows fa sheesa, fa sheesa im dunkla geyyich di gerechta.

³ Vann di foundations am fabrocha vadda sinn, vass kenna di gerechta du?”

⁴ Da Hah is in sei heilichah tempel; em Hah sei kaynich-shtool is im himmel. Sei awwa sayna, mitt sei awwa uf broviaht eah di kinnah funn mensha aus.

⁵ Da Hah broviaht di gerechta un di gottlohsa aus, un selli es gvald gleicha dutt em Hah sei sayl hassa.

⁶ Uf di gottlohsa reyyaht eah feiyahrichi kohla un brennichah shvevvel. Iahra dayl zayld haysah vind sei.

⁷ Da Hah is gerecht un eah leebt gerechtichkeit. Di gerechta zayla sei ksicht sayna.