Psalm 101 - Pennsylvania Dutch Bible

Da 101. Psalm. Vass Da Kaynich Fashprocha Hott

En Psalm fumm Dawfit.

¹ Ich vill singa veyyich bamhatzichkeit un veyyich feah sei; zu diah, Oh Hah, vill ich lohb singa.

² Ich vill acht gevva un mich unshuldichah uf fiahra; vann kumsht du zu miah? Ich vill in meim haus lawfa mitt en unshuldich hatz.

³ Ich loss kenn evil ding fannich mei awwa kumma; ich hass di eahvet funn selli es vekk falla, un ich loss iahra sacha nett ivvah-nemma in miah.

⁴ En falsh hatz soll veit vekk bleiva funn miah; ich zayl nix zu du havva mitt evil.

⁵ Ich zayl ennich ebbah shtill macha es hinna rumm shvetzt veyyich sei nochbah. Ich vill nix zu du havva mitt ebbah es grohs-feelich un hohchmeedich is.

⁶ Mei awwa zayla uf di shtandhafticha im land sei, so es si bei miah bleiva sella; sellah es lawft in en unshuldichah vayk, soll mich deena.

⁷ Falshi leit sella nett in meim haus bleiva; ebbah es leekt zayld nett bei miah sei.

⁸ Alli meiya butz ich vekk awl di gottlohsa im land; ich yawk awl di evil-shaffah aus em Hah sei shtatt.