Hosea 14 - Pennsylvania Dutch Bible

Es 14. Gabiddel. Da Hosea Famohnd Israel

¹ Drayyet zrikk zu eiyah Gott, oh Israel, fa eiyah sinda henn eich shtolbahra gmacht!

² Nemmet dee vadda mitt eich un gaynd zrikk zumm Hah. Sawwet zu eem: “Fagebb unsah sinda un nemm uns gnaydich oh, so es miah di frucht funn unsah leftz opfahra kenna.

³ Es land Assur kann uns nett helfa; miah vella nimmi uf greeks-geil reida. Miah vella nee nimmi sawwa zu di sacha es unsah hend gmacht henn, ‘Diah sind unsah gott’; fa in diah finna di kinnah unni eldra bamhatzichkeit.”

En Nei Layva Fa Israel

⁴ “Ich zayl iahra vekk-drayyes hayla un si geahn leeb havva, veil mei zann nau vekk gedrayt is funn eena.

⁵ Ich vill sei zu Israel vi da dau; eah zayld bleeya vi en lilya-blumm. Sei vatzla zayla ausshlauwa vi di cedar-baym in Lebanon.

⁶ Sei shprauts zayla ausnannah vaxa; eah zayld so shay sei es en ayl-bohm, un sei kshmakk vi en cedar-bohm in Lebanon.

⁷ Si zayla viddah unnich seim shadda hokka, un vaxa vi frucht. Si zayla bleeya vi en drauva-shtokk, un zayla so goot-shmakkich sei es da vei funn Lebanon.

⁸ Oh Ephraim, vass may habb ich zu du mitt abgettah? Ich binn sellah es dich abheicht un dich heet. Ich binn vi en bohm es immah gree is, un dei frucht kumd funn miah.”

⁹ Veah hott veisheit? Eah fashtayt dee sacha. Veah hott eisicht? Eah fameikt si. Di vayya fumm Hah sinn recht; un di gerechta lawfa drinn, avvah di ivvah-dreddah shtolbahra drinn.