Psalms 81 - Holy Bible Nigerian Pidgin English

Feast Song

Asaf Song For Di Kwayamasta

¹ Make wi sing praiz God wey bi awa strent. Make wi sing praiz Jakob God.

² Make una sing and play sheke-sheke. Make una use jita and harp play sweet music.

³ Make una blow ram horn wons new moon or full moon festival start!

⁴ Bikos dis na wetin dem rite for Israel law and na wetin Jakob God kommand.

⁵ E make dis law for Israel pipol wen E attack Egypt land just to free us. Den I hear one vois wey I nor know dey sey,

⁶ “Si, I don take di load komot from una shoulder; I don free una from di heavy work wey una dey do.

⁷ Una kry to mi for help wen una dey trobol and I save una; I ansa with strong tonda kon test una faith wen wota nor dey to drink for Meribah.

⁸ My pipol make una listin to mi as I dey warn una! Israel pipol, make una obey mi!

⁹ Una must nor serve anoda god; una must nor bow before any oda god.

¹⁰ Bikos na mi wey bi una Oga God, save una from Egypt land. Make una open una mout wide and I go pak good tins full am.

¹¹ But my pipol nor gri listin. Israel pipol nor wont make I dey with dem.

¹² So I let dem do di tins wey dey hongry dem to do kon live dia life di way dem wont am.

¹³ How I wish my pipol go gri listin to mi! How I wish sey Israel pipol go follow mi kon do as I tell dem!

¹⁴ Den I for fit kwik distroy dia enemies! My hand for kwik tosh doz wey dey worry dem!

¹⁵ Make pipol wey hate God, fear as dem si am; make disgrace follow dem forever.

¹⁶ But I go give Israel pipol betta food chop; I go make una beleful with betta honey wey dey flow kom out from di rock.”