Psalms 8 - Holy Bible Nigerian Pidgin English

God Glory And Man Honor

David Song

¹ Oga awa God, yor greatness full di whole world! Yor glory high pass di heavens.

² Yu don tish shidren and small pikin, so dat dem go fit tok about yor pawa and how Yu take silent yor enemies and doz wey dey oppoz Yu.

³ Wen I look di sky for nite kon si di work wey Yu do; di moon and di stars wey Yu keep for dia place,

⁴ I dey ask mysef, “Wetin pipol bi wey Yu dey tink about dem? Na ordinary human being Yu dey kare about?”

⁵ Yu make dem bi like Yu kon give dem glory and honor.

⁶ Yu sey make dem kare for evritin wey Yu kreate, bikos Yu put evritin under dia kontrol;

⁷ all di animals, both wiked and di ones wey nor wiked,

⁸ di birds for di sky, di fish for sea and evritin wey dey swim for wota.

⁹ Oga awa God, yor greatness full di whole world.