Psalms 75 - Holy Bible Nigerian Pidgin English

Na God Bi Judge

Asaf Song For Di Kwayamasta

¹ My God, wi tank Yu! Wi dey tank Yu bikos Yu dey near us and pipol for evriwhere dey tok about di wonderful tins wey Yu dey do.

² God sey, “Wen di time wey I choose don rish, I go judge pipol.

³ Di eart go shake and evribody go fear, bikos na mi make di foundashon.

⁴ I don warn proud pipol sey, ‘Make dem stop to dey make mout!’ kon tell wiked pipol sey, ‘Make una nor dey happy sey una don win!

⁵ Make una nor tink sey una don win di fight or karry body up wen una dey tok.’ ”

⁶ Viktory nor dey kom from east or west or from di wildaness,

⁷ bikos na God dey judge! E dey bring one pesin down and karry anoda pesin up.

⁸ One cup wey full with wine wey dem mix with spice, dey for God hand and E pour am for di world. True-true, all di wiked pipol for di world go drink from am till e finish.

⁹ But for mi, I go always dey tok about wetin Yu don do; I go sing and praiz Jakob God!

¹⁰ God sey, “I go distroy wiked pipol with dia pawa kon give viktory to pipol wey dey fear mi.”