Psalms 67 - Holy Bible Nigerian Pidgin English

Tanksgivin Song

David Song For Di Kwayamasta

¹ Make God show us en favor and bless us! Make E always dey happy with us!

² Den pipol wey dey for di world go know wetin Yu like; all di nashons go know how Yu take diliver yor pipol.

³ My God, make evribody for dis world tank Yu! Make all di nashon give Yu praiz!

⁴ Make strenjas happy well-well, bikos Yu dey judge pipol matter well and na Yu dey rule di world.

⁵ My God, make evribody for dis world tank Yu! Make all di nashon give Yu praiz!

⁶ All di seed wey dem plant dey grow well for di eart, so make di Oga awa God, bless us!

⁷ Make E bless us, den evritin for di eart go gi-am di honor wey bi en own.