Psalms 6 - Holy Bible Nigerian Pidgin English

Prayer For Help

David Song

¹ My God, make Yu nor drive mi, bikos Yu dey vex. Nor ponish mi with yor vexnashon.

² Make Yu sorry for mi, bikos I dey weak. Make Yu heal mi, bikos my bones dey shake.

³ I dey fear well-well. Na how e go tey rish, before Yu go kon save mi?

⁴ Make Yu kom back kon help mi. Save mi bikos of yor love wey nor dey fail.

⁵ Pesin wey don die, nor dey remember Yu. Na who go fit praiz Yu from inside grave?

⁶ I don taya to komplain, bikos evry nite, I dey wet my bed with wota from my eyes.

⁷ Sofa don make my eyes blind. My eyes dey weak, bikos of my enemies.

⁸ All of una wey dey do bad tins, make una leave mi alone, bikos God don hear my kry.

⁹ God don hear as I dey beg; E go ansa my prayers.

¹⁰ So make disgrace follow all my enemies and make dem dey fear well-well! Make dem run turn back, go hide with shame.