Psalms 56 - Holy Bible Nigerian Pidgin English

Prayer To Trust God

David Song Wen Filistia Pipol Dey Porshu Am

¹ My God, make Yu sorry for mi, bikos pipol dey attack mi. My enemies dey attack mi evriday.

² Pipol wey won si sey I fall, dey always attack mi. True-true many of dem dey fight mi.

³ But even as I dey fear, I still trust Yu.

⁴ I praiz God for wetin E don promise. I trust God, so wetin go make mi dey fear?

⁵ Evriday, dem dey kause wahala for mi. All wetin dem sabi, na to dey plan bad tins against mi.

⁶ Dem dey gada hide dey look mi; dey monitor mi as I dey waka and dem dey ready to kill mi.

⁷ So my God, make Yu distroy dem bikos of di bad tins wey dem dey do. Make Yu nor let dem eskape!

⁸ Yu know di pains wey I dey face. As I dey kry, Yu put all my tear for bottol kon rite wetin I dey sofa for yor book.

⁹ My enemies go run wen I koll Yu for help, bikos I know sey God dey for my side!

¹⁰ I dey praiz God for wetin E don promise. Yes! I go dey praiz am, bikos of en promise.

¹¹ I trust God well-well, so wetin go make mi dey fear? Wetin ordinary human being go fit do mi?

¹² My God, I go do wetin I vow to give Yu and tank Yu, bikos of how Yu dey help mi.

¹³ Yu don save mi from deat and Yu nor let mi fall at-all, so I go always dey serve Yu, as I dey enjoy dis life.