Psalms 53 - Holy Bible Nigerian Pidgin EnglishMen Wikedness David Song For Di Kwayamasta 1 Na fools dey tok for dia heart sey, “God nor dey.” Dem don spoil; na bad tins dem dey do and e nor get any one among dem wey dey do good! 2 God dey from heaven look evribody; E dey look to si if anybody really get sense and weda anybody really dey find am. 3 But nor bi so. Evribody don dey sin; evribody don spoil finish. E nor get anybody wey dey do good at-all! 4 Pipol wey dey do wiked tins nor get sense at-all? Dem dey chop my pipol like bread and dem nor ever dey tink sey e good make dem pray to God. 5 Fear go katch dem and na di kind fear wey dem neva si or hear before. God go skata yor enemies bones. God go disgrace dem, bikos E don rijet dem. 6 Na who go kom from Mount Zion kon save Israel pipol? Wen God don save en pipol, den Jakob shidren go shaut with joy and Israel pipol go happy well-well. |
© 2019, Wycliffe Bible Translators, Inc. in cooperation with The Nigerian Pidgin Translation Committee
Wycliffe Bible Translators, Inc.