Psalms 47 - Holy Bible Nigerian Pidgin English

Na God Dey Rule Di World

David Song Wey Korah Shidren Sing

¹ Evribody! Make una kom! Make una klap una hand! Make una shaut praiz God with klean mind!

² Bikos di Most High dey good! Na-im bi di great King for di whole eart.

³ E distroy di pipol wey dey before us kon put awa enemies under awa leg.

⁴ E choose and give us di Promise Land as awa propaty for life; di place wey dey make Jakob shidren-shidren happy; di shidren wey God love.

⁵ God dey waka go en throne and pipol dey shaut and blow trumpet as E dey go.

⁶ So, make una sing praiz God; make una praiz am; make una sing praiz to awa King, make una sing praiz am!

⁷ Na God bi di King for all di eart. Make una praiz am with psalms!

⁸ Na God dey rule all di nashons, even as E sidan for en holy throne.

⁹ Di rulers for di world gada togeda with Abraham and God pipol, but bikos na God bi di King of evry king, make una honor am for evriwhere for di world.