Psalms 43 - Holy Bible Nigerian Pidgin English

Man Wey Dey Strenj Land Prayer

¹ My God, make Yu show sey I dey innocent! Save mi from pipol wey nor dey fear Yu. Diliver mi from doz wey dey lie,

² bikos na Yu bi di God wey dey save mi. But wetin make Yu rijet mi? Why I go dey waka with pains, bikos my enemies dey opress mi?

³ Make Yu send yor lite and trut kon guide mi. Make dem karry mi go yor holy mountin, di place wey Yu dey stay.

⁴ For der, I go-go God altar; di God wey dey give mi joy kon praiz am with my harp!

⁵ Wetin make my soul dey weak? Wetin make my heart nor happy at-all? But I go put my hope for God hand! I go praiz am again, bikos na-im bi my Savior and God!