Psalms 41 - Holy Bible Nigerian Pidgin English

Man Wey Dey Sick, Prayer

David Song For Di Kwayamasta

¹ Na blessing go follow doz wey dey do good for poor pipol! God dey always save dem from trobol.

² Make God protet and keep dem alive. Make E make dem prosper for di land and save dem from dia enemies.

³ God dey kare for dem wen dem dey sick kon make dem well again.

⁴ My God, I dey pray sey, “Make Yu sorry for mi. Make Yu heal mi, bikos I don sin against Yu.”

⁵ Na only bad-bad tins my enemies dey tok about mi. Dem dey ask, “Wen e go take die make pipol forget am?”

⁶ Dem dey visit mi like sey dem bi my friends, but na wikedness full dia heart and wen dem komot from where I dey, dem go-go spoil mi give evribody.

⁷ Pipol wey hate mi dey tok for each oda ear about mi and na only bad tins dem dey tink about mi.

⁸ Dem sey, “E get some bad-bad diziz. E nor go ever get up from dat bed!”

⁹ Even my best friend, di one wey I trust with evritin; pesin wey wi dey chop togeda, don turn against mi.

¹⁰ So Oga God, make Yu sorry for mi. Make I well again, so dat I go pay dem back!

¹¹ Like dis, I know sey I dey make belle sweet Yu, bikos Yu neva let my enemies win mi.

¹² Instead, Yu don keep my life, bikos I dey innocent; Yu don let mi enter yor present forever.

¹³ So make una praiz di Oga wey bi Israel God, bikos E dey alive forever and ever. Amen!