Psalms 4 - Holy Bible Nigerian Pidgin English

Prayer For Help For Evening

For Di Kwayamasta: David Song

¹ My God, make Yu ansa mi wen I koll Yu. Na only Yu go fit diliver and free mi from wiked pipol and all my trobol. Make Yu sorry for mi kon hear my prayers.

² Na how long pipol go take dey tok bad about mi? How long una go dey tok wetin I nor do? How long una go kontinue to dey lie for my head?

³ Make una know sey, God dey keep doz wey dey fear am for ensef and E go ansa wen wi koll am.

⁴ So make yu fear God and nor sin. Make yu tink about am for nite kon turn from yor sins.

⁵ Make yu offa sakrifice with di rite spirit give God kon trust am.

⁶ Many pipol dey sey, “Who go fit show us wetin dey good?” So my God, make Yu smile for us.

⁷ Yu don give mi more joy pass doz wey get many food and wine to drink.

⁸ I dey sleep with peace, bikos na only Yu wey bi my God, dey save mi.