Psalms 29 - Holy Bible Nigerian Pidgin English

God Tok Inside Tonda

David Song

¹ Make all di angels for heaven honor God; make una honor am, bikos of en glory and strent.

² Make una honor God, bikos en name get glory. Make una woship God, bikos of en holiness.

³ God vois dey sound on-top di sea and en vois bi like tonda, bikos na en bi di God wey dey kause tonda on-top strong sea.

⁴ God vois get pawa well-well; en vois get glory.

⁵ God vois dey break mighty cedar tree! Yes, e dey skata cedar trees for Lebanon.

⁶ E make Mount Lebanon dey shake like small animal kon make Mount Hermon dey jump like small melu.

⁷ God vois dey kom with strong lite.

⁸ God vois dey make di wildaness shake. Yes! En vois dey shake Kadesh Valley.

⁹ God vois dey bend big trees and skata leaf for forest. Evribody for di temple dey sey, “Make glory bi yor own!”

¹⁰ Na God dey rule ova wota and E go bi king forever.

¹¹ Na God dey give en pipol strent and na en dey bless dem with peace.