Psalms 19 - Holy Bible Nigerian Pidgin English

God Work And En Glory

For Di Kwayamasta: David Song

¹ Di heavens dey show as God glory bi. Di sky dey show how en work big rish.

² Dem dey show am evriday and for evry nite, dem dey show en greatness.

³ Dem nor dey tok out or sey pesin hear dia vois,

⁴ yet dia vois don rish evriwhere for di eart and dia word don pass evriwhere for di world. God don build house for di sun for heaven

⁵ and e dey shine kom out like man wey just marry. E dey happy like pesin wey dey ready to run race.

⁶ Di sun dey kom out from one end for di heavens till e rish di oda end and nor-tin fit hide from en heat.

God Law

⁷ God laws dey korrect and e dey save life. Di laws wey God give us na trut and dem dey give wisdom to pipol wey ready to learn.

⁸ God kommands dey rite and e dey put joy for pesin heart. En kommands dey klear and e dey give pesin hope to stay for dis world.

⁹ To fear God dey good, bikos e dey give pesin hope forever. God laws korrect and dem dey okay.

¹⁰ Dem betta pass silva and even gold wey fine well-well. Dem sweet pass honey; even di honey wey dey fall from bee house.

¹¹ Dem dey tish yor savant well and doz wey dey obey dem, go get betta reward.

¹² So God, how I won take know all my fault? Make Yu klean mi from di bad tins wey I do wey I nor know.

¹³ Make Yu nor let mi do anytin wey nor good for yor eye and nor let sin kontrol mi. Den I go dey innocent and I nor go sin again.

¹⁴ My Oga God wey bi my Rock and Savior, make di word from my mout and di tins wey I dey tink, dey good for yor eye and sweet Yu well-well.