Psalms 149 - Holy Bible Nigerian Pidgin English

Praiz Song

¹ Make wi praiz di Oga wey bi awa God kon sing new song to am. Make wi sing praiz am for where en pipol gada put.

² Israel pipol, make una happy bikos of di Pesin wey kreate una. Jerusalem pipol, make una praiz God well-well.

³ Make una dance praiz en name with sheke-sheke and jita,

⁴ bikos God like en pipol and doz wey honbol demsef, E dey make dem win.

⁵ Make doz wey dey fear am, happy, bikos E go fight for dem! Make dem shaut for joy as dem dey sleep for dia bed!

⁶ As dem hold swod wey get two mout for dia hand, make dem praiz God,

⁷ so dat dem go fit revensh dia enemies kon ponish di strenjas.

⁸ Dem tie dia enemies kings with shains and dia priests with iron

⁹ and dem dey judge dem just as dem rite am. God go fight for evribody wey dey serve am! So make wi praiz di Oga wey bi awa God!