Psalms 14 - Holy Bible Nigerian Pidgin English

As Man Wiked Rish

For Di Kwayamasta: David Song

¹ Na only fools dey tok for dia heart sey, “God nor dey.” Dem nor good at-all and dia ways bad well-well. No one among dem dey do wetin good!

² God dey look evribody from heaven; E dey look to si if anybody really get sense and dey find am.

³ But e nor dey, bikos evribody don turn from am; evribody don spoil finish. Nobody dey do good again. Yes! E nor get anybody at-all.

⁴ Doz wey dey do bad nor go ever learn? Dem dey chop my pipol like bread and dem nor dey pray to God.

⁵ So fear go katch dem, bikos God dey with di pipol wey dey obey am.

⁶ Even doh wiked pipol dey fight poor pipol, God go guide and protet dem.

⁷ E go from Zion kon save Israel pipol! So wen God don save en pipol, Jakob shidren go shaut with joy and Israel pipol go happy well-well.