Psalms 132 - Holy Bible Nigerian Pidgin English

Praiz For Di Temple

David Song

¹ My God, make Yu remember David and all di sofa wey e sofa.

² E make promise give Yu and E vow give di Oga wey bi Israel God sey,

³ “I nor go-go my house or go sleep for my bed.

⁴ I nor go gri sleep or let sleep katch mi

⁵ until I find di place where I go build God house put; one big temple for di Oga God wey dey save Israel.”

⁶ Wi hear sey di Kovenant Box dey for Efrat; den wi si am for Jaar town.

⁷ Make wi go God temple; make wi woship am for front of en throne.

⁸ My God, make Yu raiz-up kon enter yor place where rest dey, with di Kovenant Box wey dey show yor pawa.

⁹ Make yor glory kover yor priest; make joy full yor loyal savants heart.

¹⁰ Bikos I bi yor savant, make Yu nor rijet mi David, di king wey Yu choose.

¹¹ God promise David di kind promise wey nor go shange sey: “I go put one among yor shidren for di throne.

¹² Den if yor shidren-shidren obey di kovenant and di laws wey I tish dem, dem go bi king forever.”

¹³ Yes! God don choose Jerusalem; E don choose di town as en own

¹⁴ and E sey, “I go dey rest for here forever. I go stay der, bikos na mi choose am.

¹⁵ I go bless dis town kon make am prosper. Den I go dey feed di poor pipol wey dey di land.

¹⁶ I go protet en priests and joy go full di heart of doz wey dey fear God.

¹⁷ For der, I go make David pawa strong; bikos I don decide sey, en shidren-shidren go bi king forever.

¹⁸ I go disgrace en enemies and David kingdom go rule forever.”