Psalms 13 - Holy Bible Nigerian Pidgin English

Prayer For Help

For Di Kwayamasta: David Song

¹ My God, Yu go forget mi forever? Na how long Yu go trowey yor face from mi?

² How long I go dey struggol with pain inside my soul and get sorrow for my heart? Na how long my enemies go always dey opress mi?

³ My Oga God, make Yu turn kon ansa mi! Make yu give mi strent again or I go die.

⁴ Make Yu nor let my enemies dey make mout sey, “Wi don win am!” Den dem go dey happy sey I don fall.

⁵ But I trust yor love wey nor dey fail. I go happy, bikos Yu don save mi.

⁶ Yes! I go sing to God, bikos E don save mi.