Psalms 129 - Holy Bible Nigerian Pidgin English

Prayer Against Israel Enemies

Solomon Song

¹ Make Israel pipol sey, “Na since wi dey small awa enemies don dey opress us.

² Even doh enemies dey attack us since wi dey small kom rish naw, dem neva ever fit win us.

³ Dem don use cutlass kut all awa back like sey na farmer klear am.

⁴ But God dey good; E don kut di rope wey wiked pipol take tie us and naw, wi don dey free.

⁵ So, make evribody wey hate Jerusalem, turn back with shame.

⁶ Make dem dey yuzles like grass wey dey on-top roof, wey go die as e dey grow

⁷ and pipol nor go plok or si am again.

⁸ Yes! Pipol wey dey waka pass nor go sey, ‘Make Oga God bless dem’ or sey, ‘Wi bless una with Oga God name.’ ”