Psalms 128 - Holy Bible Nigerian Pidgin English

To Obey God Dey Pay

Solomon Song

¹ Make una si di blessing wey dey follow doz wey dey fear and do wetin God kommand.

² Yu go enjoy wetin yu dey work for! Yes! Yu go dey happy and sikure.

³ Yor wife go bi like vineyard wey get betta fruit and e go prosper for yor house. Yor shidren go bi like yong olive tree.

⁴ Yes! True-true, dis na God blessing for doz wey dey fear am.

⁵ Make God always dey bless yu from Zion. As long as yu dey alive, yu go si Jerusalem dey prosper.

⁶ Yu go live to enjoy yor shidren-shidren. Make peace always dey Israel land!