Psalms 124 - Holy Bible Nigerian Pidgin English

Na God Dey Protet En Pipol

David Song

¹ Make Israel pipol sey, “If to sey Oga God nor dey awa side?”

² If to sey God nor really dey awa side wen pipol attack us,

³ dem for don swallow us alive as dem dey vex.

⁴ River for don kover us; wota for don karry us go.

⁵ Strong wave for river for don kover awa soul.

⁶ So, make wi praiz God wey nor let awa enemies tear us to pieces with dia tit!

⁷ Wi don eskape like bird wey komot from hunta trap. Dia trap and net wey dem set for us, don break and wi don dey free!

⁸ God wey kreate heaven and eart, na-im diliver us from dia hand.