Psalms 116 - Holy Bible Nigerian Pidgin English

Man Wey God Save From Deat

¹ I love God, bikos E dey hear my vois and my prayer for help.

² E dey listin to mi, so as long as I dey alive, I go dey pray to am to help mi,

³ bikos deat kover mi like klot and di fear to die go grave, dey make mi shake. Na only sorrow and trobol I dey si.

⁴ So I koll God name: “Oga God, abeg make Yu kom save mi!”

⁵ Naw, make una si as God kind and good rish! Dis awa God too dey pity for pesin!

⁶ God dey protet pipol wey dia faith neva too strong and even wen I dey face deat, E kom save mi!

⁷ So my soul go rest again, bikos God dey good to mi.

⁸ Yes! E save mi from deat kon remove tears from my eyes, so dat I nor go fall.

⁹ I dey waka for God present as I dey for dis world!

¹⁰ I get faith wen I sey, “My God, I bilive Yu, even doh my mind really dey trobol mi.”

¹¹ As I dey vex, I kon sey, “Evribody dey lie well-well!”

¹² So, wetin I go give God for evritin wey E don do for mi?

¹³ I go dance bikos E diliver mi kon praiz God name forever.

¹⁴ I go keep my promise wey I make to God for en pipol present.

¹⁵ God dey kare for en pipol and E dey pain am well-well wen di ones wey E love, dey die.

¹⁶ My God, I bi yor savant; yes, I bi yor savant wey dem born for yor house and Yu don free mi from di shains kon save mi from deat.

¹⁷ So I go tank God with sakrifice kon pray to am.

¹⁸ Na for pipol present I go for do wetin I vow to God

¹⁹ and na for God house wey dey Jerusalem. So make wi praiz di Oga wey bi awa God!