Psalms 11 - Holy Bible Nigerian Pidgin English

Hope For God

David Song

¹ I bilive and trust sey God go protet mi. So wetin make yu dey sey, “Fly like bird go hide for mountin, so dat yu go dey save,

² bikos wiked pipol dey wound innocent pipol anyhow. Dem hide for darkness dey shot good pipol with dia bow and arrow.

³ So, naw wey di foundashon don skata, wetin good pipol go fit do?”

⁴ But God dey for en holy temple; E dey rule from heaven. E dey look as evribody dey live dia life for dis eart.

⁵ God dey si both good and bad pipol. E hate doz wey love wahala.

⁶ E go burn wiked pipol with shako, sulfur and fire kon distroy dem with strong breeze.

⁷ God dey good and E dey judge well; so E go favor doz wey dey do good too.