Psalms 1 - Holy Bible Nigerian Pidgin English

God Blessing

¹ God go bless di pesin wey nor dey follow wiked pipol advise, dey waka with sinnas or sidan with aproko pipol!

² Instead, e dey always dey happy to obey God kommand and na both for day and nite, e dey study dem.

³ E bi like tree wey dem plant near wota; wey dey bear fruit for di korrect time and en leaf nor dey dry. E dey prosper for anytin wey e do.

⁴ But nor bi so e bi for wiked pipol! Instead, dem bi like leaf wey breeze blow trowey.

⁵ Bikos of dis, wiked pipol nor go fit stand for Judgement Day and sinnas nor go fit dey for where God pipol gada put.

⁶ True-true, God dey guide en pipol for evritin wey dem dey do, but E go distroy doz wey nor dey follow en ways.