Proverbs 24 - Holy Bible Nigerian Pidgin English

Di Nineteent Word

¹ Make yu nor jealous evil pipol or try to make friend with dem,

² bikos na only trobol dem dey always tink about and anytin wey dem tok, dey kause wahala.

Nomba Twenty Word

³ Na wisdom pesin dey take build house, but na undastandin go make am stand

⁴ and na knowledge dem take dey dekorate am with fine and betta tins.

Nomba Twenty-one Word

⁵ To dey wise, betta pass to dey strong! Yes, wisdom betta pass pawa.

⁶ So make sure sey yu plan well before yu go fight and di more dem advise yu well, di more yu go dey win.

Nomba Twenty-two Word

⁷ Wise word too deep for foolish pipol to undastand. So wen ever pipol dey tok about sirious matter, foolish pipol nor get any betta tin to tok put.

Nomba Twenty-three Word

⁸ If yu dey always plan evil, na trobol-maker dem go dey koll yu,

⁹ bikos anytin wey foolish pesin plan, dey make pesin sin and pipol nor like pesin wey dey laf odas.

Nomba Twenty-four Word

¹⁰ If yu faint for di day wen wahala kom, dat one go show sey yor strent small well-well.

Nomba Twenty-five Word

¹¹ Kwik save doz wey dem won kill for wetin dem nor do.

¹² If yu fit sey e nor koncern yu, God know and dey judge evritin wey yu dey do. E dey look yu and E know yu well-well. E go reward yu akordin to wetin yu do.

Nomba Twenty-six Word

¹³ My pikin, make yu chop honey bikos e good. Just as honey sweet for yor mout,

¹⁴ na so wisdom dey good for di soul. Make yu get wisdom and yor future go dey sikure.

Nomba Twenty-seven Word

¹⁵ Make yu nor bi like wiked pipol wey dey plan to tif from good pipol or break enter dia house,

¹⁶ bikos no matter how many times good pipol fall; dem dey always get up again; but trobol dey distroy wiked pipol.

Nomba Twenty-eight Word

¹⁷ Make yu nor dey happy if yor enemies enter trobol and nor rijoice wen dem fall,

¹⁸ bikos God go know if yu dey happy and E nor go like am; den E fit nor kon ponish dem again.

Nomba Twenty-nine Word

¹⁹ Make yu nor fear doz wey dey do evil and make yu nor jealous wiked pipol at-all,

²⁰ bikos wiked pesin nor get betta future and dem nor dey hope for anytin again.

Nomba Thirty Word

²¹ So my pikin, make yu fear God and honor di king. Make yu nor do anytin with pipol wey dey tok against dem,

²² bikos God fit distroy dat kind pipol wons and who know di wahala wey God and di king fit kause for dem?

Oda-wise Word

²³ Wise pipol still tok dis tins too: E bad well-well if judge nor dey judge well for kourt.

²⁴ If di judge sey na di pesin wey do wrong dey innocent, evribody go curse and hate am.

²⁵ Judge wey dey ponish pesin wey do wrong, go prosper and get good name,

²⁶ bikos, honest ansa na good sign for true friendship.

²⁷ Before yu build yor house, make sure sey yu don prepare and ready yor farm for work.

²⁸ Nor tok against anoda pesin without good rizin or tok yeye tins about pipol.

²⁹ Nor boast sey, “I go do am back wetin e do mi. Yes! I go deal with am well-well.”

³⁰ Wen I waka pass foolish and lazy pesin farm and vineyard,

³¹ na shuku-shuku and grass grow full am. Di wall wey dem build round am, don fall rish groun.

³² I look kon tink and I kon learn lesin from am sey:

³³ Make yu sleep and rest as yu like or fold yor hand and rest small,

³⁴ but make yu remember sey, as yu dey sleep, poverty go kom attack yu like tif.