Jonah 2 - Holy Bible Nigerian Pidgin English

Jonah Pray

¹ As Jonah dey inside di fish belle, e kon pray to God.

² E sey, “I kry give Yu wen I dey wahala and Yu ansa mi. Naw, I dey kry to Yu from where dead body dey, so make Yu go kom help mi and hear my prayers.

³ Na Yu God trow mi inside dis deep sea. Yu trow mi inside di river and di wota and waves kon kover mi.

⁴ Den I sey, ‘Oga God, Yu don drive mi komot from yor present kpata-kpata and I nor go ever si yor holy temple again!’

⁵ Di wota kover and almost kill mi. Naw, I don sink enter di sea. Even di leaf dem wey dey di sea, don tie my head.

⁶ I sink go under di mountins kon enter inside one place where I go bi prisona forever. But Yu, my God don take mi komot from di pit.

⁷ Wen I tink sey my life don dey finish, I kon pray give Yu and Yu hear mi from yor holy temple.

⁸ Doz wey dey woship juju, don abandon di good tins wey God suppose do for dem.

⁹ But as for mi, I go sing praiz Yu; I go offa sakrifice give Yu kon do wetin I promise, bikos na only Yu fit save mi!”

¹⁰ Den God kon kommand di fish make e go vomit Jonah put for dry land.