Job 29 - Holy Bible Nigerian Pidgin English

Job Still Dey Tok

¹ Job still sey:

² “If to sey my life go fit bi as e bi before wen God dey look and guide mi!

³ Dat time, God always dey with mi and E dey give mi lite wen I dey waka for darkness.

⁴ Dat na di time wey evritin still dey well with mi. Den God goodness still dey protet my house.

⁵ Den God still dey with mi and all my shidren gada round mi.

⁶ My melu and goats dey give mi plenty milk and my olive tree dey grow for groun wey dry and strong.

⁷ Wen ever di town eldas dey meet and I go der,

⁸ yong boys dey stand as soon as dem si mi dey kom and old pipol dey stand greet mi with respet.

⁹ Di leaders wey dey lead di pipol go stop to tok.

¹⁰ Even di pesin wey dey important pass, go shut up for mi.

Job Dey Good Well-well

¹¹ “Evribody wey hear from mi, dey praiz mi. Doz wey hear mi dey tok, go-go tok good about mi.

¹² Wen poor pipol kry kom meet mi, I dey help dem; I dey help pikin wey nor get papa and mama and doz wey nor get where to go.

¹³ Doz wey dey face wahala, dey praiz mi and I dey protet and guide wimen wey dia husband don die.

¹⁴ I dey always do betta tin. Evritin wey I do dey always dey good.

¹⁵ Na mi bi blind pipol eye and doz wey nor fit waka, na mi bi dia leg.

¹⁶ I bi like papa to poor pipol and I dey setol matter even for doz wey I nor know.

¹⁷ I dey distroy wiked pipol pawa kon release di pesin wey dem katch.

Job Get Mind

¹⁸ “Den I sey, I go get long life kon die for my house without trobol.

¹⁹ I go bi like tree wey en rut get wota; wey dew dey wet en branches.

²⁰ Evribody go dey praiz mi and my pawa nor go fail.

Job Good Karata

²¹ “Wen I dey advise pipol, dem dey kwayet listin to wetin I dey tok

²² and dem nor dey get anytin to tok wen I don tok finish. My word dey enter dia mind well.

²³ Evribody dey welkom mi, just as farmer dey welkom rain wey won fall.

²⁴ I dey smile give dem wey nor bilive diasef again and my betta face dey give dem hope.

²⁵ I dey lead dem as king dey lead many pipol kon konfort dem wen dem dey face trobol.