Job 26 - Holy Bible Nigerian Pidgin English

Job Ansa Bildad

¹ Job ansa:

² “Si how yu don help pipol wey nor get pawa. Yu don save pipol wey nor get strent at-all!

³ Yu dey give dem good advise kon share wetin yu know with fools, like mi!

⁴ Who yu feel sey go hear all wetin yu dey tok? Na wish spirit make yu dey tok like dis?

God Great

⁵ “Dead body dey shake with fear for dia grave. Evritin wey dey inside wota dey shake too.

⁶ Where dead body dey stay just dey open before God; nor-tin fit kover am from en eye.

⁷ God spread di sky for nort kon hang di eart for empty space.

⁸ Na God put wota for di kloud and E nor dey let rain fall from di kloud with force.

⁹ Na-im use di kloud take kover di moon.

¹⁰ E kreate di sky wen E separate di wota and divide lite from darkness.

¹¹ As God tok, di pila wey hold di sky kon dey shake with fear.

¹² Na en pawa E use take silent di sea. Na en wisdom E take distroy Rahab wey bi di wota juju.

¹³ Wen E breath, di sky dey klear. Na en hand E take distroy di big snake.

¹⁴ But all dis na small tin kompare to di pawa wey E get. Na small wi don hear. Who go fit really undastand how God strong and great rish?”