Job 23 - Holy Bible Nigerian Pidgin English

Job Ansa Again

¹ Job kon ansa:

² “Today, my komplain still dey make my heart betta; I nor fit hold my bitterness.

³ If to sey I know where I go for si God and how to go where E dey,

⁴ I for komplain gi-am kon tell am all di trobol wey I dey face.

⁵ I won know wetin E go tok and how E go ansa mi.

⁶ God go fight mi with all en pawa? No! I nor tink so. E go listin and ansa mi wen I tok.

⁷ Since pesin wey dey rite with God fit go follow am tok, den E go diliver mi from pipol wey dey judge mi, forever.

⁸ I don find am go east, but I nor si am. I nor si am for west wen I find am go der too.

⁹ Wen God dey work for nort and sout, I nor still si am.

¹⁰ Yet, God know evry step wey I dey take. If E sey make E test mi, I go klean kom out like gold.

¹¹ Bikos I just dey waka follow God for back; for di road wey E choose by ensef and I nor dey waka on my own.

¹² I dey always do wetin E tok; dey follow en words; nor bi my own.

¹³ E neva shange and nobody fit oppoz or stop am from wetin E won do.

¹⁴ E go do wetin E don plan for mi. Na-im dey kontrol my destini.

¹⁵ Na dis make mi dey fear and wen ever I si am, my hold body go dey shake.

¹⁶ True-true, na God make mi dey fear. E don distroy di mind wey I get.

¹⁷ Na God, nor bi di darkness make mi kwayet, even doh di darkness don kover my face.