1 Kronikles 13 - Holy Bible Nigerian Pidgin English

Uzza Die

¹ King David koll and tok to di ofisas with

² Israel pipol sey, “If una and di Oga awa God go like am, den e betta make wi send message go meet awa remainin brodas, priests and Levi pipol for dia towns sey make dem gada kom

³ follow us go karry God Kovenant Box, wey dem abandon thru-out di time wey Saul bi king.”

⁴ Wetin David tok, kon make di pipol dey happy.

⁵ So David gada Israel pipol from Shihor River for Egypt go rish Hamat, so dat dem go-go bring God Kovenant Box from Kiriat-Jearim.

⁶ David and all di pipol kon go Baalah town (wey bi Kiriat-Jearim), for Judah go bring God Kovenant Box wey dey on-top di creature wey get feada. Na God name dem dey koll di box.

⁷ Dem bring di Kovenant box kom out from Abinadab house, put am for one new truck and na Uzza and Ahio dey guide am.

⁸ David with all di pipol kon dey dance with dia heart to honor God. Dem sing dey play instrument, harp, drums, cymbals and trumpets.

⁹ Wen dem rish where dem for dey separate wheat for Kidon, di truck wey dem put di Kovenant Box kon dey shake like sey e won fall, so Uzza kon hold di box make e for nor fall.

¹⁰ At wons, God vex kon kill Uzza, bikos e tosh di box.

¹¹ David vex well-well, bikos God kill Uzza, so e koll di place Perez Uzza and na-im dem dey koll am till today.

¹² Den David kon dey fear God dat day so e kon sey, “How I go take karry di Kovenant Box naw?”

¹³ So David nor karry am go Jerusalem again, instead, e karry am go Obed-Edom wey kom from Gat, house.

¹⁴ God Kovenant Box dey Obed-Edom house for three monts, so God bless Obed-Edom family and evritin wey dem get.