Yonas 2 - Beibel na Papiamentu Koriente 2013

Orashon di Yonas

¹ For di den barika di e piská Yonas a resa na SEÑOR su Dios.

² El a bisa: ‘Den mi ansha mi a yama Bo, SEÑOR, i Bo a rospondé mi. For di den profundidat di morto mi a sklama na Bo, SEÑOR, i Bo a skucha mi.

³ Bo a tira mi te den fondo di laman, korientenan di awa a rondoná mi; tur bo olanan altu i brutu a pasa riba mi.

⁴ I ami, mi a bisa: “Bo a kore ku mi for di bo bista. Lo mi bolbe weta bo tèmpel santu un dia?”

⁵ Awa tabata rondoná mi i menasá mi, laman hundu tabata tapa mi di tur banda i tabatin lima lorá rònt di mi kabes.

⁶ Mi a senk bai te den fondo di laman kaminda serunan tin nan orígen; portanan di mundu a sera pa semper mi tras. Pero Abo, SEÑOR mi Dios, a saka mi bibu for di e abismo akí.

⁷ Ora mi a sinti ku rosea di bida tabata kaba pa mi, mi a kòrda riba bo, SEÑOR, i mi orashon a yega serka Bo den bo tèmpel santu.

⁸ Esnan ku ta sirbi diosnan falsu, ku no por yuda nan ku nada, ta laga Abo, ku ta fiel na nan, kai.

⁹ Pero ami, ku kantika di gradisimentu, lo mi ofresé Bo sakrifisio. Ami ke kumpli ku loke mi a primintí, SEÑOR. Abo so por trese salbashon!’

¹⁰ E ora ei riba òrdu di SEÑOR e piská a skupi Yonas bèk riba tera.