Salmo 105 - Beibel na Papiamentu Koriente 2013

SALMO 105 Kon Dios a guia su pueblo durante su historia

¹ Alabá SEÑOR, invoká su nòmber, laga pueblonan tende di su obranan grandi!

² Boso kanta p'E, toka arpa na su honor i konta di tur obra milagroso di su man.

³ Sinti boso orguyoso ku su nòmber santu, laga esnan ku ta buska SEÑOR ta kontentu!

⁴ Puntra pa SEÑOR, akudí na su poder, buska su kara tur ora bai.

⁵ Rekordá e kosnan milagroso k'El a hasi, su señalnan, e òrdunan saliendo fo'i su boka,

⁶ boso, famia di Abraham, Dios su sirbidó, yunan di Yakob, ku El a elegí.

⁷ T'E ta SEÑOR, nos Dios, su òrdunan ta konta pa henter mundu.

⁸ E ta kòrda su aliansa eternamente, su promesa na mil generashon,

⁹ e pakto, será ku Abraham, e huramentu, hasí na Isak,

¹⁰ konfirmá komo lei pa Yakob, un aliansa eterno ku Israel:

¹¹ ‘Mi ta duna bo tera di Kanaan, e pais ku ta toka abo i tur bo desendientenan despues.’

¹² Tempu nan tabata poko ainda, — kasi nada — i strañero den tera

¹³ i nan a dualu di pueblo pa pueblo, di ún reino pa un otro nashon,

¹⁴ E no a laga ningun hende oprimí nan; reinan El a skual pa nan motibu:

¹⁵ ‘No mishi ku nan, nan ta sagrado, no hasi mi profetanan daño!’

¹⁶ El a trese hamber den tera, no tabatin pan mas den kas di hende.

¹⁷ El a manda un hòmber nan dilanti, Jozef, bendí komo katibu.

¹⁸ Nan a bui su pianan i mara su garganta na kadena,

¹⁹ te na e momento ku a sali loke el a bisa padilanti i palabra di SEÑOR a komprob'é.

²⁰ Fárao a manda lòs su buinan, dominadó di nashonnan a libr'é.

²¹ El a nombr'é kabes di su kas ku poder riba tur su poseshonnan:

²² pa e traha prínsipenan lei i pa e instruí su konseheronan.

²³ Despues Israel a bini Egipto, Yakob — wéspet den tera di Ham.

²⁴ Dios a duna su pueblo hopi yu i mas poder ku tur su enemigunan,

²⁵ ku p'esei a kambia di aktitut i a kuminsá haña rabia riba nan, yen di astusia kontra Dios su sirbidónan.

²⁶ El a manda Moises, su sirbidó, i Aaron ku El a elegí.

²⁷ Nan a hasi entre nan tur e señalnan ku palabra di Dios a anunsiá, sí, milagernan den tera di Ham.

²⁸ El a manda skuridat: a bira skur, ma egipsionan no a tende p'E.

²⁹ El a kambia nan awa na sanger i a laga nan piskánan muri.

³⁰ Nan tera a yena patapata ku sapu, te asta den salanan di rei.

³¹ El a papia i henter e teritorio a yena ku sangura i muska.

³² Nan áwaseru El a kambia na eis, a tira rayo di welek riba tera.

³³ El a daña nan matanan di wendrùif pareu ku nan palunan di figo; El a splèndu tur palu aya banda.

³⁴ El a papia i a bini dalakochi, un kantidat inkontabel di badjaga.

³⁵ Nan a kome tur mata di tera, a devorá tur fruta di kunuku.

³⁶ El a dal tur yu mayó den tera mata, promé fruta di nan potensia di hòmber.

³⁷ Despues El a saka su pueblo, kargá di plata i oro; den su tribunan ningun no a kai afó.

³⁸ Egipto a gosa, ora nan a sali, komo e tabatin miedu di nan.

³⁹ Dios a habri un nubia komo tapa i un kandela pa lusa den anochi.

⁴⁰ Nan a pidi: El a manda nan sloke. El a yena nan ku pan for di shelu,

⁴¹ a sples baranka i awa a basha, kore manera un riu den tera seku.

⁴² Komo El a kòrda su palabranan sagrado, e promesa na Abraham, su sirbidó.

⁴³ El a laga su pueblo sali ku alegria, su eskohidonan ku gran entusiasmo,

⁴⁴ El a duna nan tera di pueblonan strañero, i a laga nan tuma poseshon di loke nashonnan a kansa kurpa p'e,

⁴⁵ pa nan por a opservá su dekretonan i por a kumpli ku su leinan. Alabá sea SEÑOR!