Salmo 10 - Beibel na Papiamentu Koriente 2013

SALMO 10 Dios ta defendé hende flihí kontra hende malbado

¹ SEÑOR, di kon Bo ta keda para leu, Bo ta keda skondí den tempu di apuro?

² Pobernan ta sufri pa soberbia di mal hende: laga nan kai den trampa ku nan mes a pone!

³ Pekadó ta broma ku su kièr ta triunfá, e ta sigui stafa hende i maldishoná, sí, ta SEÑOR e ta menospresiá.

⁴ E pekadó, arogante, no ta maha ku Dios; ‘Ai nò, no tin Dios,’ nada mas e no ta pensa.

⁵ Semper e tin suerte ni maske kiko e hasi, bo huisionan ta altu p'e, leu di su kabes; su enemigunan — ai, desden e tin pa tur!

⁶ E ta bisa den su mes: ‘Nada no ta pasa mi, ún manera mi hamas i nunka lo no pena.’

⁷ Maldishon so e ta papia, mentira i menasa, ultrahe i maldat ta na su punta di lenga.

⁸ E ta ten'é skondí den pueblonan chikí, ketu ketu e ta mata hende inosente, e no ta pèrdè hende débil fo'i bista,

⁹ e ta lur den skondí — un leon den yerba altu; e ta lur e pober pa e lastr'é bai kuné, e ta lastr'é bai kuné, ta sera reda rònt di dje;

¹⁰ e ta bùk i ta sera su kurpa pa e bula — duele pa esun ku kai den su gara.

¹¹ E ta bisa den su mes: ‘Dios no ta ripará, Dios a kita kara, E no ta mir'é nunka.’

¹² Lanta, SEÑOR! O Dios, hisa man! No lubidá riba hende flihí.

¹³ Pakiko e malbado no tin Dios pa nada i ta bisa den su mes: ‘Bo no ta pidi kuenta?’

¹⁴ Ma Bo ta mira sí! Bo ta ripará, tur pena i fèrdrit, Bo ke pis'é den bo man. Hende sin amparo ta konfia den Bo, Abo ta yudansa di yunan sin mama.

¹⁵ Kibra forsa di mal hende i malechor, pidié kuenta di su malu pa kaba.

¹⁶ SEÑOR lo ta Rei pa awor i pa semper, den su tera lo no sobra pagano mas.

¹⁷ SEÑOR, Bo ta skucha deseo di humildenan, duna nan balor, hasi kaso di nan.

¹⁸ Sali pa wérfano, pa hende oprimí, pa ningun hende mortal no yen'é mas ku teror.