Ruth 3 - Beibel na Papiamentu Koriente 2013

Bondat di Boaz

¹ Un dia Noemi a bisa Ruth: ‘Mi yu, mi tin ku buska un kasamentu pa bo, pa bo forma un hogar i biba felis.

² Manera bo sa, Boaz, ku ta doño di trabou di e hendenan ku bo a traha kuné, ta nos famia. Tende, awe tardesitu e ta bai den kunuku pa bencha grano.

³ Baña, perfumá bo kurpa, bisti bo bistí di mas bunita i bai aya. No laga Boaz ripará ku bo t'ei promé ku e kaba di kome i bebe.

⁴ Paga bon tinu na unda e ta kai drumi. E ora ei bo ta bai, bo ta lanta e paña ku ta tapa su pianan i bo ta drumi einan. Djei e mes lo bisa bo kiko bo mester hasi.’

⁵ Ruth a rospondé: ‘Lo mi hasi tur loke bo a bisa mi.’

⁶ Ruth a bai den kunuku i a hasi manera su suegra a mand'é.

⁷ Boaz a kome i bebe barika yen. Djei el a kai drumi banda di un monton di sebada. Ketu ketu Ruth a yega serka, el a hisa e paña for di Boaz su pianan i kai drumi.

⁸ Meianochi Boaz a spièrta di gòlpi, lanta sinta i topa ku un muhé drumí na su pia.

⁹ Boaz a puntr'é: ‘Ta ken bo ta?’ El a kontestá: ‘Ami ta Ruth, bo sirbidó. Si tòg ta bo deber pa sòru pa mi, lo bo n' kasa ku mi?’

¹⁰ Boaz a bisa: ‘SEÑOR bendishoná bo, mi yu. Awor mas ku nunka bo a demostrá bo fieldat, pasobra bo por a skohe un otro hòmber mas hóben ku mi, pober òf riku, ma bo no a hasié.

¹¹ Mi yu, no preokupá bo. Lo mi hasi pa bo tur loke bo pidi mi. Henter pueblo sa ku bo ta un muhé balente.

¹² Mi sa ku mi tin ku sòru pa bo, pero tene kuenta ku tin un pariente mas yegá ku mi.

¹³ Keda aki awe nochi. Si resultá mañan mainta ku e ke kumpli ku su debernan di famia, ta bon, pero si e no ke, mi ta primintí bo dilanti di SEÑOR, ku ami lo kumpli. Drumi numa te mainta.’

¹⁴ Asina Ruth a drumi na pia di Boaz te mainta. Ora ku tabata skur ainda i ku bo no por a mira ken ta ken el a lanta, pasobra

¹⁵ Boaz a bis'é: ‘Mira pa niun hende haña sa ku tabatin un muhé aki.’ Promé ku e bai Boaz a bis'é: ‘Bini ku bo mantel aki, habrié i ten'é duru.’ Ora Ruth a hasi esaki, Boaz a basha seis be un kantidat di sebada pa e bai kuné. Despues Boaz a bolbe siudat.

¹⁶ Ora Ruth a yega serka su suegra, Noemi a puntr'é: ‘Kon a bai bo, mi yu?’ I Ruth a kont'é tur loke Boaz a hasi p'e.

¹⁷ El a agregá: ‘Tur e sebada akí el a duna mi i el a bisa mi ku mi no por bolbe man bashí serka mi suegra.’

¹⁸ Noemi a bisa: ‘Mi yu, warda trankil kon kos ta desaroyá. E hòmber akí lo no sosegá awe tanten e no resolvé e asuntu akí.’