Romanonan 4 - Beibel na Papiamentu Koriente 2013

Ehèmpel di Abraham

¹ Awor laga nos wak e kaso di Abraham, tata di nos pueblo. Kiko tabata su eksperensia?

² Si ta Abraham su mes esfuerso a pone ku Dios a asept'é komo hustu, lo e tabatin motibu pa broma! Pero e no tin motibu pa broma serka Dios!

³ Pasobra Skritura ta bisa: ‘Abraham a kere Dios; Dios a tene kuenta ku su fe i konsider'é un hende hustu.’

⁴ Awor ta asina ku un trahadó ta haña e pago ku e tin derecho riba dje, e no ta hañ'é komo regalo.

⁵ Pero si un hende kere den Dios ku ta aseptá hende pekadó, Dios lo tene kuenta ku su fe i asept'é, ounke e no a hasi nada pa meresé esei.

⁶ David mes a papia di felisidat di e hende ku Dios ta aseptá sin ku e meresé esaki, ora el a bisa:

⁷ Felis t'esnan kende nan erornan ta pordoná, kende nan pikánan ta tapá.

⁸ Felis ta e hende ku Señor, no ta tuma su piká na kuenta.

⁹ Awor e felisidat ei ta pa hende ku ta sirkunsidá so òf ta pa hende no-sirkunsidá tambe? Nos ta bisa ku Dios a tuma Abraham su fe na kuenta i asina a asept'é komo hustu.

¹⁰ Pero ki ora Dios a tuma su fe na kuenta? Despues òf promé ku a sirkunsid'é? No despues, pero promé!

¹¹ El a haña e marka di sirkunsishon te despues, komo prueba ku Dios a asept'é pa motibu di su fe, tempu e no tabata sirkunsidá ainda. Ke men, pa motibu di su fe Abraham a bira tata di tur ku tin fe, sin ku nan ta sirkunsidá. I asina Dios lo aseptá nan tambe.

¹² Anto Abraham ta tata di esnan ku no solamente ta sirkunsidá, pero ku ta sigui den su paso, esta den e fe ku e tabatin promé ku a sirkunsid'é.

Dios su promesa a duna Abraham fe

¹³ Dios a primintí Abraham i su desendientenan ku nan lo haña mundu komo propiedat. Pero e promesa ei no tabata mará na kumplimentu ku Lei di Moises, pero na e echo ku Dios ta aseptá hende, basta nan kere den djE.

¹⁴ Si kumplimentu ku Lei tabata un kondishon pa haña mundu komo propiedat, lo no tabata bale la pena tin fe i e promesa lo no tabatin balor.

¹⁵ Lei ta trese kastigu, pero kaminda no tin Lei, hende no por faya kuné tampoko!

¹⁶ P'esei, pa e promesa hasí na Abraham por a konta sigur pa tur su desendientenan, e mester tabata un regalo di Dios, basá riba fe. E ta konta pa tur desendiente di Abraham, no solamente pa esnan ku ta obedesé Lei di Moises, pero tambe pa esnan ku fe den Dios manera Abraham. I Abraham ta tata di nos tur,

¹⁷ manera ta skibí den Skritura: ‘Mi a hasi bo tata di hopi nashon.’ E ta tata den bista di e Dios den kende el a pone su fe; e Dios ku ta duna morto bida i ta duna òrdu pa kos ku ainda no ta eksistí keda kreá.

¹⁸ Ora ya no tabatin speransa mas pa un yu, tòg el a kere, el a karga speransa i asina a bira tata di hopi nashon, manera Dios a bis'é: ‘Asina tantu desendiente lo bo haña!’

¹⁹ Abraham su fe no a kai, ounke e tabatin kasi shen aña di edat i a ripará ku su kurpa a bira bieu kaba i ku Sara, su kasá, no por a haña yu mas.

²⁰ E no tabatin duda ni a deskonfiá loke Dios a primintí, al kontrario su fe a bira mas fuerte i el a alabá Dios,

²¹ kompletamente konvensí ku Esun ku a duna su promesa tin poder tambe pa kumpli kuné.

²² Pa motibu di su fe Dios a aseptá Abraham komo un hende hustu.

²³ Anto esaki no ta skibí pa Abraham so,

²⁴ pero pa nos tambe. Pues Dios ta tuma nos fe tambe na kuenta, basta nos kere den Esun ku a lanta nos Señor Hesus for di morto.

²⁵ Hesus a keda entregá na morto pa nos pikánan i a lant'É for di morto pa Dios por aseptá nos komo hustu.