Proverbionan 27 - Beibel na Papiamentu Koriente 2013

¹ No kana blòf kiko bo ta bai hasi mañan, pasobra bo n' sa kiko un dia por trese.

² Laga otro hende gaba bo, no bo mes boka, otro hende, no bo mes lepnan.

³ Santu ta pisá i piedra ta pisa hopi; pero disgustu pa motibu di un hende bobo ta pisa bo mas.

⁴ Ira ta kruel i rabia por hoga bo, pero ken por resistí yalurs?

⁵ Mihó un skual den bo kara, ku amor skondí.

⁶ Bo por konfia e amigu ku ta hùrt bo mas ku e enemigu ku ta sunchi bo.

⁷ Hende barika yen ta laga e miel di mas dushi para, pero p'esun ku tin hamber, e kos di mas marga ta sut.

⁸ Manera un para ku dualu bai for di su nèshi asina e hende ku dualu bai fo'i kas, ta.

⁹ Dushi di kòmbersashon k'un amigu ta sinseridat, e ta manera un masashi ku zeta kostoso i un pasatempu den un kamber ku perfume dushi di sensia ta pone hole dushi.

¹⁰ No bandoná bo amigu ni e amigu di bo tata, no bai kas di bo ruman ora ta bai bo malu, mihó un bon bisiña ku un amigu leu.

¹¹ Mi yu, biba sabí, lo ta un legria pa mi; pasobra ora hende hasi bofon di mi pa bo motibu, mi tin kos di bis'é.

¹² Un hende sabí a mira peliger i buska kamind'i skonde, un bobo a bai riba dje i sufri daño.

¹³ Tuma mantel di esun ku ke para bòrg pa un strañero, keda ku e mantel si ta pa un muhé strañero e ta para bòrg.

¹⁴ Si un hende tur mainta ora e lanta, grita bendishoná su bisiña, e bisiña por tum'é na malu.

¹⁵ Un dak ku ta lèk riba un dia di awa: awa ta keda lèk. Esei e muhé ku tur ora bai ta buska kestion parse.

¹⁶ Ke dominá un muhé asina ta manera ke kohe bientu tene òf ke tene zeta den man.

¹⁷ Manera ta mula heru ku heru asina hende ta hasi punta di bista di su amigu mas krítiko.

¹⁸ Es ku kuida e pal'i figo ta kome figo, es ku kuida su shon ta keda elogiá.

¹⁹ Manera awa ta reflehá un kara asina kurason di hende ta reflehá e hende.

²⁰ Reino di morto ta un abismo insatisfecho; meskos hende: loke su wowo mira, e ke.

²¹ Manera kandela ta afiná oro i plata, bon nòmber di un hende ta proba ken e ta.

²² Maske bo bati un hende bobo den un fènsu, batié manera ta bati maishi k'un man di fènsu, bo n' ta saka su bobedat fo'i dje.

²³ Kuida salú di bo tou di bestia, paga tinu na bo karnénan i kabritunan.

²⁴ Pasobra rikesa no ta dura pa semper. Akaso rikesa i prosperidat t'ei pa semper?

²⁵ Ora kab'i kòrta yerba pa bestia i yerba nobo ta krese atrobe, i e yerba riba seru ta kòrtá,

²⁶ bo tin bo karnénan pa duna bo lana pa traha paña, bo chubatunan pa bende pa haña sèn pa kumpra tereno

²⁷ i bo kabritunan pa duna abo, bo famia i esnan ku ta traha pa bo, lechi na abundansia pa bebe.