Proverbionan 22 - Beibel na Papiamentu Koriente 2013

¹ Bon fama i bon reputashon ta bal mas ku abundansia di oro i plata.

² Riku i pober tin ún kos komun, esta, ta SEÑOR a krea tur dos.

³ Hende sabí ta mira peliger i ta evit'é, esun sin eksperensia ta dal bai i haña su kastigu.

⁴ Hende ku tin rèspèt di SEÑOR i humildat, ta haña komo rekompensa: bida, rikesa i honor.

⁵ Kaminda di mal hende ta yen di sumpiña i trampa; es ku stima su bida ta evitá nan.

⁶ Siña un mucha fo'i chikitu pa e sigui e bon kaminda, ya ora e bira mas grandi, e n' ta kita fo'i dje.

⁷ Hende riku tin hende pober den nan gara; es ku fia, ta bira katibu di esun ku a fi'é.

⁸ Es ku sembra inhustisia ta kosechá desaster, e sèpter ku e tabata bati asina furioso kuné ta kibra.

⁹ Hende ku ke otro hende bon lo ta bendishoná, pasobra e ta kompartí kuminda ku hende pober.

¹⁰ Kore k'esun ku ta buska kestion, i pleitu ta kaba, pleitamentu i zundramentu ta stòp.

¹¹ Rei tin dos amigu: hende kurason puru i hende ku palabra amabel.

¹² SEÑOR ta perkurá pa bèrdat keda rekonosé; E ta desmentí loke mentirosonan afirmá.

¹³ E floho ta bisa komo preteksto: ‘Mi n' por sali pafó. Tin un leon den kaya, e por kome mi.’

¹⁴ Trasteria di e muhé di bida ta un pos hundu, esnan ku SEÑOR maldishoná ta kai den dje.

¹⁵ Mucha tin tendensia di hasi ko'i bobo, pero e ta stòp ora e haña un halá 'i sota.

¹⁶ Hende ku eksplotá hende pober pa enrikesé su mes i esun ku ta generoso ku hende riku, tur dos ta kaba den pobresa.

¹⁷ Skucha palabra di hende sabí ku atenshon i paga tinu na loke mi ke siña bo.

¹⁸ Pasobra lo t'un goso pa bo warda e palabranan akí den bo kurason, ya lo bo por usa nan ora di mester.

¹⁹ Abo, sí abo, mi ke pa tende nan, pa bo konfia den SEÑOR.

²⁰ Mi n' skibi kos importante pa bo? Konseho korekto i práktiko,

²¹ pa siña bo konosé e bèrdat, pa bo por duna esnan ku mi manda pa bo un bon kontesta.

— 1 —

²² No abusá di hende pober pasobra e ta pober, ni oprimí esun sin defensa dilanti di hues.

²³ Pasobra SEÑOR lo sali na nan defensa i mata esnan ku ker a mata nan.

— 2 —

²⁴ No anda ku hende ku ta rabia lihé, ni sera amistat kuné.

²⁵ Sino bo ta bai komportá meskos i hasi bo mes daño.

— 3 —

²⁶ No primintí di para bòrg pa debe di otro hende.

²⁷ Lo bo ke pa nan hisa bo kama bai kuné, si bo no por kumpli?

— 4 —

²⁸ No perhudiká otro hende kambiando frontera bieu fihá pa bo antepasadonan.

— 5 —

²⁹ Hende ku ta traha bon lo traha pa rei i no pa ken ku ta.