Proverbionan 18 - Beibel na Papiamentu Koriente 2013

¹ Hende ku ta isolá nan mes ta sigui solamente nan mes kièr; nan ta oponé kontra tur bon konseho.

² Hende bobo n' ta apresiá komprenshon; ta solamente nan opinion nan ke laga tende.

³ Ku maldat ta bini bèrgwensa, ku orguyo, despresio.

⁴ Palabra di bon hende ta fuente di sabiduria, hundu manera laman, refreskante manera un riu.

⁵ No ta bon pa privilegiá un hende kulpabel, ni pa retené derechi di un hende inosente.

⁶ Ta palabra di hende bobo ta hinka nan den problema i ta nan boka ta pidi un bon halá di sota.

⁷ Palabra di hende bobo ta bira nan pèrdishon, nan palabranan mes ta horka nan.

⁸ Hende ta guli redu manera pan kayente, e ta baha bai te nos paden aya.

⁹ Hende floho i hende destruktivo ta resultá asta di ta ruman.

¹⁰ Nòmber di SEÑOR ta manera un toren poderoso, ei hende hustu ta akudí pa haña protekshon.

¹¹ Forsa di hende riku ta nan rikesa, den nan pensamentu nan propiedat ta un fòrti, un muraya inkapturabel.

¹² Tras di orguyo ta bini frakaso; pa risibí honor, mester ta humilde promé.

¹³ Rospondé promé ku kaba di skucha ta ko'i bobo i un bèrgwensa.

¹⁴ Ora di malesa, ánimo ta tene hende riba pia, pero si un hende no tin ánimo, kon e ta hasi lant'ariba?

¹⁵ Hende sabí ta haña komprenshon, komo nan ta tene nan kurason i nan orea habrí p'e.

¹⁶ Regalo ta habri porta, laga bo drenta serka hende importante.

¹⁷ Esun ku presentá su kaso promé ta parse di tin rason, te ora un otro hende bini dilanti i hasi pregunta.

¹⁸ Tiramentu di lòt ta pone fin na un diskushon, e ta kita e partidonan ku ta bringa otro, fo'i otro.

¹⁹ Ta mas fásil pa penetrá drenta un fòrti, ku pa aserká un bon konosí ku ta sintié ofendí. Ta mas trabou pa resolvé diferensia di opinion ku pa kita e balki ku ta tene porta di un fòrti será.

²⁰ Barika di kada hende ta yená ku loke su palabranan produsí.

²¹ Palabra tin poder riba bida i morto; hende ku gusta papia, mester karga e konsekuensianan.

²² Es ku a haña un esposa, a kai den bon: el a risibí muestra di Dios su bondat.

²³ Hende pober ta papia pidi; hende riku ta rospondé brutu.

²⁴ Hende ku hopi amigu ta haña nan den problema, amigu berdadero ta nifiká mas ku ruman.