Numbernan 1 - Beibel na Papiamentu Koriente 2013

Senso den desierto di Sinai

¹ Den desierto di Sinai SEÑOR a papia ku Moises den tènt di enkuentro. Tabata riba promé dia di e di dos luna den e di dos aña ku nan a sali for di Egipto. El a bisa:

^2-3 ‘Bai abo ku Aaron bai konta henter e komunidat di Israel. Registrá tur hende hòmber di binti aña bai ariba ku ta apto pa bai guera. Pone nan segun generashon i famia.

⁴ For di kada tribu un hefe di famia mester yuda boso:

⁵ for di tribu di Ruben: Elisur, yu di Shedeur;

⁶ for di tribu di Simeon: Shelumiel, yu di Surishadai;

⁷ for di tribu di Huda: Nagshon, yu di Aminadab;

⁸ for di tribu di Isakar: Netanel, yu di Suar;

⁹ for di tribu di Zebulon: Eliab, yu di Helon;

¹⁰ di e desendientenan di Jozef: for di tribu di Efraim: Elishama, yu di Amihud i for di tribu di Manase: Gamliel, yu di Pedasur;

¹¹ for di tribu di Benhamin: Abidan, yu di Guideoni;

¹² for di tribu di Dan: Ahiezèr, yu di Amishadai;

¹³ for di tribu di Asher: Pagiel, yu di Okran;

¹⁴ for di tribu di Gad: Elyasaf, yu di Deuel;

¹⁵ for di tribu di Naftali: Ahira, yu di Enan.

¹⁶ Esaki ta e hefenan ku boso mester nombra komo lider di e israelitanan.’

^17-46 Riba e mesun dia ei Moises ku Aaron huntu ku e hòmbernan ariba menshoná a yama tur e israelitanan huntu. Aya den desierto di Sinai a tene e senso ku SEÑOR a ordená. A konta i registrá tur hende hòmber di binti aña bai ariba ku tabata apto pa bai guera segun generashon i famia. E senso a kuminsá na tribu di Ruben, yu mayó di Yakob. Aki ta sigui e kantidat di hòmber di kada tribu: tribu di Ruben 46.500; tribu di Simeon 59.300; tribu di Gad 45.650; tribu di Huda 74.600; tribu di Isakar 54.400; tribu di Zebulon 57.400; tribu di Efraim 40.500; tribu di Manase 32.200; tribu di Benhamin 35.400; tribu di Dan 62.700; tribu di Asher 41.500; tribu di Naftali 53.400. E kantidat di hòmber di riba binti aña tabata 603.550.

⁴⁷ No a konta e levitanan komo tribu apart,

⁴⁸ pasobra SEÑOR a bisa Moises:

⁴⁹ ‘No konta e levitanan ni registrá nan huntu ku e otro israelitanan.

⁵⁰ Enkargá nan ku kuido di e tènt sagrado di aliansa ku tur loke ta pertenesé n'e. Nan mester karga e tènt sagrado ku tur loke ta pertenesé n'e, hasi sirbishi einan i lanta nan kampamentu rondó di e tènt.

⁵¹ Ora tin ku transportá e tènt, ta nan mester desarm'é i ta nan tin ku arm'é di nobo ora ta lanta un kampamentu. Tur hende no outorisá ku yega serka di e tènt sagrado lo muri.

⁵² E otro israelitanan mester lanta nan kampamentu na nan mes lugá, bou di nan mes bandera, segun nan gruponan.

⁵³ Pero e levitanan mester lanta nan kampamentu rondó di e tènt sagrado di aliansa; ya mi ira no ta kastigá komunidat di e israelitanan. Asina e levitanan mester tene warda na e tènt sagrado di aliansa.’

⁵⁴ E israelitanan tabata sigui e òrdunan ku Moises a haña di SEÑOR estriktamente.